Restaureringssenteret i Odda (RiO) fekk etter anbodsrunde oppdraget med å utforma ein rapport med tilstandsvurdering og framdriftsplan, samt skisser for ny bruk, utforma av arkitekt Gro Lavold. Denne rapporten dannar grunnlaget for det vidare søknadsarbeidet. Ein søknad til Kulturminnefondet er allereie sendt, og fleire står på trappene.

I vinter har dei arrangert ein serie litteraturkveldar kalla "Mens vi ventar på Bokbadet", ein forsmak på Litteraturhus i Odda. På desse arrangementa har Marit Eikemo og Frode Grytten invitert forfattarkollegaer til Odda og presentert dei for eit dedikert publikum på Smelt. Her har kjente forfattarar som Stig Holmås stått side om side med nye stjerneskot som Nils Henrik Smith. Norsk litteraturs grand old man, Einar Økland, har stått på programmet med ein av Oddas nye forfattarar Erlend Huus. Litterære postkort frå Låtefossen, Solfonn Høyfjellshotell og Costa Blanca er døme på tema som har stått på programmet. Norrøne mytar, hardingfelespel og sniklansering av Frode Gryttens enno upubliserte roman er andre høgdepunkt frå vinterens litteraturkveldar.

No vonar Eikemo og Grytten at mange vil møta på kafe Smelt og diskutera Odda sin nye samlingsstad og arena for litteratur, kultur, for møteverksemd, debatt, arrangement og undervisning. Kva behov har andre verksemder for eit Litteraturhus i Odda, og korleis kan dei bidra til realiseringa av prosjektet?

Marit Eikemo inviterer til presentasjon av Bokbadet saman med arkitekt Gro Lavold klokka 19 og klokka 18.00 vil Gro Lavold og presentera skisser og modell for Lindehuset.